Farar dr. Robert Malink w Rakecach zapokazany

Datum

Foto: Rafael Ledźbor

Rakečanska wosada swjeći swoje Bože słužby kóždu njedźelu w 9.30 hodź.
Jenož wuwzaćnje so tutón čas změni.
Njedźelu, 2. septembra, wotměchu so tajke wosebite kemše.
Dr. Robert Malink bu wot superintendenta Wernera Waltsgotta za noweho fararja Rakečanskeje wosady zapokazany.
Hižo do spočatka Božeje słužby w 14 hodź. bě cyrkej połna wobsadźena.
Přichwatali njeběchu jenož Rakečanscy wosadni, ale tež wěriwi ze susodnych wosadow a někotři katolscy křesćenjo.
Tež dźesać duchownych so na swjedźenskich kemšach wobdźěli:
superintendentaj Werner Waltsgott (Budyšin) a Jan Malink (Budyšin), fararce Jadwiga Malinkowa (Slepo) a Susanne Aechtner (Njeswačidło), fararjo Andreas Höhne (Budyšin), Thomas Schädlich (Huska), Thomas Haenchen (Bukecy), Steffen Hirsch (Minakał) kaž tež sup. n.w. Wolfgang Müller a farar n.w. Handrij Blumenstein.
Fararka Aechtner, kotraž bě so za čas wakancy hromadźe ze sup. Waltsgottom wo Rakečansku wosadu starała, swjedźenske kemše zahaji.
Superintendent pokaza potom na wulku zamołwitosć wosadneho fararja.
Jako asistentaj skutkowaštaj při zapokazanju fararka Jadwiga Malinkowa ze Slepoho a předsyda Rakečanskeho cyrkwinskeho předstejićerstwa Olaf Langner.
Wonaj předčitaštaj žiwjenjoběh dr. Malinka a wopismo jeho zapokazanja.
Naš nowy wosadny farar narodźi so 1975 jako Robert Lätsch w tehdyšim Karl-Marx-Stadće.
Po maturje studowaše teologiju w Lipsku, Berlinje a Baselu.
Na uniwersiće w Jenje pisaše swoje doktorske dźěło.
Tam zezna swoju přichodnu mandźelsku Lubinu Malinkec, z kotrejž so 2008 woženi a při tym jeje swójbne mjeno přiwza.
Mjeztym mataj mandźelskaj štyri dźěći.
Farar Malink bu w lěće 2008 w Leutersdorfje ordiněrowany a nastupi swoje prěnje farske městno w Spitzkunnersdorfje.
W regionje bě wosebje za dźěło z młodźinu zamołwity.
To je dobra powěsć za Rakečansku wosadu, kotraž bě w zašłych wjac hač 50 lětach wosebje wot fararjow Jana Lazarja (farar w Rakecach wot 1965 do 1989) a Andreasa Kecki (farar w Rakecach wot 1991 do 2017) formowana.
Běštaj to jara rozdźělnej wosobinje, ale wobaj staj derje a wuspěšnje z dźěćimi a młodymi ludźimi dźěłali.
Wuslědk tuteho skutkowanja bě na přikład tež na zapokazanskich kemšach widźeć, hdyž móžeše farar dr. Malink do swojeho prědowanja něhdźe 35 dźěći na dźěćace kemše rozžohnować.
Móžemy so nadźijeć, zo tutón wažny dźěl wosadneho dźěła tež přichodnje w dobrych rukach leži.
W swojim prěnim prědowanju jako Rakečanski farar rozłoži dr. Malink na zakładźe Japoštołskich skutkow 8,26–40, zo njemóžemy nikomu křesćansku wěru do wutroby stłóčić.
Ale štóž so Bohej přidruži, móže z wěstej dowěru swoje žiwjenske nadawki spjelnić.
Móc a dowěru budźe farar dr. Malink wěsće trjebać.
Wočakowanja na noweho wosadneho fararja su wulke.
Cyle wěsće su rozdźělne nahlady wo tym, wo kotre nadawki měł so wón najprjedy a wosebje starać.
Rakečanskej wosadźe přisłušeja wosadni ze wsy a zagmejnowanych wjeskow Jitk, Niža Wjes, Kača Korčma, Trupin, Komorow, Stróža, Kamjenej, Nowa Wjes a Jeńšecy kaž tež ze Šćeńcy, Wysokeje a Hermanec z Łazowskeje gmejny.
Nimo teho ma so farar tež wo šulerjow Pawołskeje šule a wobydlerjow Rakečanskeje starownje starać.
W přichodźe dyrbi so Rakečanska wosada ze susodnymi wosadami Njeswačidło, Chwaćicy, Minakał/Łupoj a Klukš zjednoćić do cyrkwinskeho wobwoda.
Tež to bjez nowych wužadanjow njebudźe.
Skónčnje nadźijeja so tež čłonojo Rakečanskeje Bjesady na wobšěrnišu a kontinuowanu prezencu serbskosće na kemšach.
Hdyž wotmě so w Rakecach w 1960tych lětach někak 23 serbskich kemšow wob lěto, su to dźensa jenož hišće dwě serbskej Božej słužbje a jedne dwurěčne kemše na kermušu.
Wěmy wšak, zo njeje zmysłapołne, wjace serbskich kemšow přewjesć, dokelž je přewjele Serbow z Rakec a wokoliny zwisk k serbšćinje zhubiło.
Jeli pak by so přichodnje husćišo serbšćina samozrozumliwje na kemšach wužiwała a hdys a hdys serbski kěrluš zaklinčał, by to wulkotnje było.
Snano so nam to poradźi.
Serbšćina wšak bě jedna z přičinow za dr. Malinka a jeho swójbu, so do Rakec přesydlić.
Po zapokazanju bu farar dr. Malink wot sup. Waltsgotta požohnowany a přija potom žohnowanja fararki Aechtner, swojeje swakoweje fararki Malinkoweje, swojeho přichodneho nana sup. Malinka, fararja Blumensteina a Olafa Langnera.
Njech žohnowanske přeća, hač němsce abo serbsce přednjesene, jemu na dołhi čas móc a wutrajnosć spožča, zo swoju dowěru wobchowa a lóšt a radosć w nowym zastojnstwje njezhubi.
Po swjedźenskich kemšach podachu so kemšerjo do awle Pawołskeje šule.
Na samsnej žurli rozžohnowachu wosadni 22. septembra 2017 swojeho bywšeho fararja Kecku a nětko, lěto pozdźišo, powitachu tu noweho fararja.
Z tym zakónči so njelochki čas wakancy, bohudźak spěšnišo hač wočakowane – přičiny dosć, sej tykanc a kofej słodźeć dać.

Autor